Қазақстанда өртті тікұшақпен сөндіруге сағатына 2,5 млн жұмсалады

Өрт сөндіру кезінде авиация жұмысын қамтамасыз ету үшін бюджеттен қанша шығын жұмсалатынын Мемлекеттік бақылау, орманды күзету және қорғау басқармасының өкілдері айтып берді.

Бір ұшу сағатының орташа құны 2-2,5 млн теңгені құрайды. ТЖМ Өртке қарсы қызмет комитетінің төрағасы Ерлан Төрегелдиевтің айтуынша, ешқандай ақша адам өмірімен теңесе алмайды.

«Біздің міндетіміз – қауіпсіздікті қамтамасыз ету. «Семей орманында» басты міндет орындалғанын – өрттің елді мекендерге таралуына жол берілмегенін айтып отырмыз. Олар дәл сол жерде, орман алқабына іргелес орналасқан. Және тікелей қауіп төнді. Тек жедел әрекеттердің арқасында ғана бұған жол берілмеді», – деді Төрегелдиев брифинг барысында.

Бұған дейін Қазақстан Экология және табиғи ресурстар министрлігі «Семей орманы» резерватындағы орман өртіне байланысты қызметтік тергеу жүргізетіні белгілі болған еді.