Қазақстан зығыр тұқымын экспорттау көлемін бұрын-соңды болмаған деңгейге жеткізді. 2025/26 маркетингтік жылының қыркүйек–мамыр айларында ел шетелге 1,08 млн тоннадан астам зығыр тұқымын экспорттап, жаңа рекорд орнатты. Бұл өткен маусымның сәйкес кезеңімен салыстырғанда 2,38 есе көп.
Экспорттың негізгі бағыты – Қытай мен Еуропа. Қытайға жөнелтілген көлем шамамен 429 мың тоннаға, ал Бельгияға экспорт 309,5 мың тоннаға жетті. Сонымен қатар Польша, Германия, Чехия, Италия және басқа да еуропалық елдерге жеткізілім айтарлықтай артқан.
Мамандардың айтуынша, өсімнің басты себептерінің бірі – Еуропалық одақтың Ресейден келетін зығырға импорттық баж салығын көтеруі. Соның нәтижесінде еуропалық импорттаушылар қазақстандық өнімге көбірек бет бұрды.
Сұраныстың артуына байланысты Қазақстанның Астық одағы биылғы маусымдағы экспорт болжамын 1,25 млн тоннаға дейін көтерді. Бұл Қазақстанның әлемдік зығыр нарығындағы позициясының күшейіп келе жатқанын көрсетеді.
Тағы да оқыңыз: АҚШ Қазақстан тауарларына 12,5% жаңа баж салығын енгізді.
