20 маусым мен 20 шілде аралығында Қазақстан мұнайының әлемдік нарықтағы орташа бағасы барреліне 76 долларды құрады. Соған сәйкес, тамыз айында мұнай экспортына салынатын кедендік баж мөлшерлемесі тоннасына 76 доллар деңгейінде белгіленбек. Бұл туралы Energy Monitor хабарлады.
Алдыңғы айлармен салыстырғанда айтарлықтай төмен көрсеткіш. Мамыр және маусым айларында экспорттық баж тоннасына 130 доллар болған. Шілдеде мөлшерлеме 99 долларға дейін төмендесе, тамызда тағы 23 долларға азайып, 76 доллар болады.
Осылайша, мамыр-маусым айларымен салыстырғанда экспорттық баж мөлшері шамамен 42%-ға төмендейді.
Мұндай өзгеріске әлемдік нарықтағы мұнай бағасының төмендеуі әсер етіп отыр. Мұнай арзандаған сайын экспорттаушылардың әр тонна мұнай үшін төлейтін баж салығы да азаяды.
Бұл жағдай мұнай компаниялары үшін тиімді болуы мүмкін. Себебі экспорттық шығын төмендеп, компаниялардың сыртқы нарыққа мұнай сатудан алатын табысы біршама сақталады. Алайда мемлекет бюджетіне түсетін кедендік төлем көлемі керісінше азаюы ықтимал.
Экспорттық баж мөлшерлемесі:
- Мамыр – тоннасына 130 доллар;
- Маусым – тоннасына 130 доллар;
- Шілде – тоннасына 99 доллар;
- Тамыз – тоннасына 76 доллар.
Яғни мұнай бағасының төмендеуі бір жағынан экспорттаушыларға түсетін салықтық жүктемені азайтса, екінші жағынан бюджет кірісіне қысым түсіруі мүмкін.
