Астанада шатыр жөндеу кезінде пәтерлерді жаңбыр суы басты. Шығынды кім өтейді

Астанада қаланың бірыңғай келбетін қалыптастыру және дизайн талаптарын сақтау аясында жөндеу жұмыстары жүргізіліп жатқан үйлердің бірінде бірнеше пәтерді су басты. Ақпаратты қала әкімдігінің Тұрғын үй басқармасы мен Тұрғын үй инспекциясы растаған деп хабарлайды Kursiv.media Informburo-ға сілтеме жасап.

Кенесары көшесі, 29-үйдің тұрғындары әлеуметтік желіде шағым жариялаған. Олардың айтуынша, мердігер компания шатырды 1–2 шілде аралығында бөлшектеген. Алайда жаңа шатырды орнату жұмыстары 22 шілдеге дейін жүргізілмеген.

«22 шілдеге қараған түні жауған қатты жаңбыр кезінде үй жауын-шашыннан қорғаныссыз қалды. Соның салдарынан жоғарғы қабаттағы пәтерлерді су басып, ғимарат конструкцияларына зақым келген, электр желісінде қысқа тұйықталу болған», – делінген тұрғындардың шағымында.

Әкімдік мәліметінше, 22 шілдеде басқарма өкілдері мен мердігер ұйым қызметкерлері үй тұрғындарымен кездескен.

«Мердігер ұйым қажетті алдын алу шараларын қабылдады. Шатырдың ашық қалған барлық бөліктері жаңбыр суының ғимарат ішіне өтуіне жол бермеу және тұрғындарға келуі мүмкін залалды азайту мақсатында уақытша қорғаныш полиэтилен пленкасымен және гидрооқшаулағыш материалдармен жабылды», – деп хабарлады әкімдік Informburo сауалына берген жауабында.

Қатты жаңбырдан кейін тоғыз пәтерді су басқан. Мердігер компания арнайы комиссия құрып, пәтерлерді аралап, келтірілген шығын көлемін бағалаған. Компания ғимараттың қасбетін жаңарту жұмыстары аяқталғаннан кейін зақым келген орындарды жөндейді.

«Тексеру нәтижесі бойынша шатырды күрделі жөндеу жұмыстары аяқталған соң келтірілген шығынды қалпына келтіру туралы келісімге қол жеткізілді. Барлық тоғыз пәтерде қажетті жөндеу-қалпына келтіру жұмыстары жүргізіледі», – деп хабарлады басқарма.

Айта кетейік, Астанада қаланың жаңа дизайн-кодының жобасы таныстырылған еді. Құжатта ғимараттардың қасбеттеріне, балкондарға, кондиционерлерді орналастыруға және қаланың сәулеттік келбетіне қатысты жаңа талаптар көзделген.