Қазақстандық орындаушылардың әндері бүгінде тек ел ішінде емес, шетелдік тыңдарман арасында да кең таралып жатыр. Кейбір клиптер мен музыкалық видеолар YouTube-та жүздеген миллион рет қаралып, әлемдік хиттермен бәсекелесе бастады.
Біз қазақстандық әртістер орындаған және отандық музыканттар қатысқан ең көп қаралған музыкалық видеоларды бір инфографикаға жинадық. Шеңбер неғұрлым үлкен болса, видеоның қаралымы да соғұрлым көп.
Рейтингтің алдыңғы қатарында Иманбек қатысқан SAINt JHN — Roses (Imanbek Remix), ADAM орындаған Zhurek, сондай-ақ Jah Khalib-тің бірнеше танымал әні тұр.
Бір орындаушының бірнеше әні рейтингке кірді
Рейтингте ең көп кездесетін орындаушы — Jah Khalib. Оның «Лейла», «Доча», «Medina», «Созвездие ангела», «Искал-Нашёл» және «Мамасита» әндері YouTube-тағы ең танымал қазақстандық музыкалық жұмыстардың қатарына кірді.
Бұл Jah Khalib аудиториясының бір ғана хитпен шектелмейтінін көрсетеді. Оның әр жылдары шығарған бірнеше әні әлі күнге дейін тұрақты қаралым жинап келеді.
Қазақ тіліндегі әндер де жүздеген миллион қаралым жинайды
Тізімде қазақ тіліндегі композициялар да бар. ADAM-ның «Zhurek» әні интернетте кең тарап, Қазақстаннан тыс елдерде де танымал болды.
Ерке Есмаханның «Қайда?» әні де қазақстандық YouTube кеңістігіндегі ең ірі хиттердің бірі болып қалды. Бұдан бөлек, Азия мен Baqay орындаған «Опмай-опмай», Жазира Байырбекованың «Тұсау кесер», Ерке Есмахан мен Төреғали Төреәлінің «Алло» әндері рейтингке енді.
Бұл қазақ тіліндегі музыканың аудиториясы тек Қазақстанмен шектелмейтінін аңғартады. Әннің әуені, қайырмасы және әлеуметтік желілердегі танымалдығы тілдік кедергіден асып, жаңа тыңдарманға жетуге мүмкіндік береді.
