«Фридом Финанс» «ҚазТАГ» материалдарынан 233 млрд теңге шығын келгенін мәлімдеді

«ҚазТАГ» ісіндегі сот жарыссөзінде «Фридом Финанс» өкілдері жүйелі түрде компанияға қарсы ақпарат таратылғанын, ал агенттік жариялаған материалдардан клиенттер қаражатын жаппай шығарып алып, миллиардтаған шығынға әкелгенін мәлімдеді. 

«Фридом Финанстың» құқықтық және комплаенс-стратегия жөніндегі басқарушы директоры Егор Трофимов пен компания адвокаты Александр Камендровский соттан айыпталушылардың әрекеттеріне құқықтық баға беруін сұрады.

Камендровскийдің айтуынша, сотта айыпталушылардың әрекетін растайтын дәлелдер зерттелді. Сөзінше, агенттіктің бас директоры Әсет Матаев БАҚ басшысы әрі иесі ретінде редакция жұмысын бақылай алған, алайда «Фридом Финанс» жайында көптеген негатив материалдың жариялануына тосқауыл болмаған.

Адвокаттың сөзінше, бір жарым жыл ішінде агенттік компания және оның негізін қалаушы Тимур Турлов туралы шамамен 250 материал жариялаған. Демалыс және мереке күндерін есепке алмағанда, екі күн сайын бір материалдан жарияланып отырған дегенді білдіреді. 

Камендровский материалдардың бір бөлігі шыққан кезде Матаевтың демалыста болғаны туралы қорғау тарапының уәжін сынға алды. Адвокаттың айтуынша, еңбек демалысына шығу компания басшысының өкілетін тоқтатпайды және оны заңды тұлғаның қызметі үшін жауапкершіліктен босатпайды.

Камендровский сот назарын «ҚазТАГ» бас редакторы Әмір Касеновтің Матаевтың электрондық цифрлық қолтаңбасын пайдаланғанына да аударды. Айтуынша, бұл мәселе сот процесі барысында бірнеше рет талқыланған.

Сонымен қатар «Фридом Финанс» өкілі компания мәлімдеген шығынды еске салды. Оның айтуынша, даулы материалдың таралуы 233 млрд теңге көлемінде шығынға әкелген.

Трофимовтің айтуынша, екі инвестор екі түрлі жағдайда ақшасынан айырылған. Бірінде клиент ақшаны үшінші тұлғаға тікелей берген (Виталий Световойдың ісі), ал екіншісінде брокерлік шотқа логин мен пароль арқылы кіруге мүмкіндік берген (Темирлан Беков пен Жанна Капарованың ісі). Демек екеуі де компанияның қауіпсіздік шараларын өз еркімен сақтамаған.

Осы шағымнан кейін «Фридом Финанс» ішкі тексеру жүргізіп, клиенттермен кездескенін, өз ұстанымын жария түрде түсіндіргенін және реттеуші органдармен әрі құқық қорғау органдарымен жұмыс істей бастаған.

Трофимовтың айтуынша, кешенді тексеру инвесторларға келген шығын үшін компания жауапты деуге негіз таппаған. Алайда кейін клиенттер «Фридом Финансқа» жария түрде қысым көрсете бастаған.

Сотталушы Қапарова – кәсіби таргетолог. Трофимов негатив ақпараттың таралуын Капарованың ақпаратты ілгерілету саласындағы осы кәсіби қызметінің қатысы туралы да айтты. Сотталушы ақпаратты тарату үшін қолайлы аудиторияны, уақытты таңдап, өзінің кәсіби дағдыларын пайдаланған болуы мүмкін.

Трофимов агенттіктің «редакция тараптарға пікірін білдіруге алаң ұсынды» деген ұстанымын сынады. Оның айтуынша, редакция материалдардың саны, тақырыптары және ақпаратты ұсыну тәсілі жөніндегі шешімді өз бетінше қабылдаған.

Трофимов сондай-ақ жарыссөз өткен күнге дейін материалдарды өшіру және теріске шығару туралы азаматтық сот шешімі орындалмағанын мәлімдеді.

Бұған дейін мемлекеттік айыптаушы сотталушылардың бас бостандығын шектеуді сұрады.