450 мың бала мектепке дайындалуға 23 млрд теңге көмек алады

Биыл әлеуметтік осал санаттағы 450 мыңға жуық балаға мектеп формасын, аяқ киім мен мектеп құралдарын сатып алуға көмек көрсетіледі. Оған жергілікті бюджеттерден 23 млрд теңгеге жуық қаражат қарастырылған.

Оқу-ағарту министрлігінің хабарлауынша, бір балаға көмектің ең төменгі мөлшері – шамамен 50 мың теңге. Бұл өткен жылмен салыстырғанда 10 пайызға артық.

Жергілікті бюджеттің мүмкіндіктеріне қарай жекелеген өңірлерде төлем мөлшері жоғары болуы мүмкін.

«Көмек жетім балалар мен ата-анасының қамқорлығынсыз қалған балаларға, аз қамтылған отбасылардан шыққан оқушыларға, атаулы әлеуметтік көмек алатын отбасылардың балаларына, сондай-ақ өмірлік қиын жағдайға тап болған балаларға беріледі», – деп таратты министрлік.

Төлемді алу үшін ата-аналар немесе заңды өкілдер тиісті құжаттарды білім беру ұйымына тапсыруы қажет.

Тақырыпқа орай: Мектеп формасын белгілі бір брендтен сатып алуға міндеттеу – заңсыз.