Іле Алатауда жарақат алған екі ресейлік альпинист тікұшақпен құтқарылды
Іле Алатаудағы шыңға шығу кезінде жарақат алған Ресейден келген екі альпинист қызды құтқарушылар эвакуациялады, деп хабарлады ТЖМ.
Альпинист қыздардың екеуі де альпинистік топтардың құрамында болған және әртүрлі күрделілік санаттарындағы маршруттар бойынша шыңдарға шыққан.
Бірінші альпинист Алматы облысы Қарасай ауданындағы Октябренок шыңына шығу кезінде аяғы сынған. Екіншісі Талғар ауданындағы Маяковский шыңына шығу кезінде жарақаттанған.
Шыңдарға Ми-8 тікұшағымен ТЖМ «Барыс» республикалық құтқару жасағының, Алматы ТЖД құтқару қызметінің құтқарушылары және Апаттар медицинасы орталығының дәрігерлері аттанды.
Әуе кемесінің экипажы, құтқарушылары мен дәрігерлері альпинист қыздарды шыңдардан кезекпен түсіріп, тікұшақпен тікелей Алматы қаласындағы №4 қалалық клиникалық ауруханасына жеткізді.
«Зардап шеккендер қажетті медициналық көмек көрсету үшін дәрігерлерге тапсырылды. Жұмыстар өте күрделі биік таулы жағдайларда жүргізілді. Тікұшақ экипажы дәл есептеулер жүргізіп, тік жартасты беткейлер арасындағы шектеулі алаңдарға сәтті қонды, бұл зардап шеккендерді қауіпсіз эвакуациялауға мүмкіндік берді», – деп хабарлады ТЖМ.
Айта кетейік, осыған дейін Түркістан тауларында бір адам қайтыс болғаны туралы жазған едік.
