Ресей әдетте мұнай өнімдерін сыртқа сататын ірі экспорттаушылардың бірі. Алайда Украина шабуылдарынан кейін елдің энергетикалық инфрақұрылымына түсетін қысым күшейіп, Мәскеу сырттан жанармай жеткізуге мәжбүр болып отыр.
Reuters мәліметінше, шілденің соңында Оңтүстік Кореядан Ресейге 30 мың тоннаға жуық мұнай өнімі жөнелтілген. Kpler және Vortexa деректеріне сәйкес, кемінде екі шағын танкер Ульсан портынан жанармай тиеп, Ресейдің Қиыр Шығысына бағыт алған. Мұндай сауда бағыты сирек кездеседі.
Жеткізілген өнімнің арасында дизель отыны бар. Reuters дереккөздерінің бірі партия құрамына авиациялық отын да кіретінін айтқан. Танкерлердің біреуі Ресейге жеткенімен, дерек жарияланған сәтте жүкті түсіріп үлгермеген. Оңтүстік Кореяның Сауда министрлігі жағдайға түсініктеме бермеген, ал Ресейдің Энергетика министрлігі Reuters сауалына жауап қайтармаған.
Бұл жағдайдың басты себебі – Ресейдің мұнай өңдеу және энергетикалық нысандарына жасалып жатқан шабуылдар. Украина мұндай соққылар Ресейдің соғысты қаржыландыру мүмкіндігін әлсіретуге бағытталғанын мәлімдеп келеді. Соның аясында Мәскеу бензин мен дизель экспортына қойылған шектеулерді 2027 жылдың қаңтарына дейін ұзартқан.
Жағдайдың ерекшелігі сол – Ресейдің өзі дәстүрлі түрде дизельдің таза экспорттаушысы саналады. Батыс санкцияларынан кейін ресейлік дизельдің негізгі сатып алушылары Бразилия, Түркия және Батыс Африка елдері болған. Енді ішкі нарықтағы қажеттілікті жабу үшін Ресейдің Азиядан дайын мұнай өнімдерін сатып алуы энергетикалық сектордағы қысымның күшейгенін көрсетеді.
Kpler мәліметінде Оңтүстік Кореядан Ресейге бұған дейінгі осындай жеткізілімдердің бірі 2022 жылғы ақпанда тіркелген: сол кезде Йосу портынан Владивостокқа шамамен 22 мың баррель авиациялық отын жеткізілген.
Тағы да оқыңыз: Грузия Ресей мұнайынан бас тартып, шикізатты Қазақстаннан алады.
