Алматыда жер сілкінісін зерттеу орталығы пайда болады

Қазақстан мен Қытай бірігіп, Алматыда жер сілкінісін зерттеу орталығының жұмысын бастайды. Бұл туралы Төтенше жағдай министрлігі хабарлады.

8 тамызда орталықты салтанатты түрде ашу рәсімі өтті. Шараға ТЖ министрі Шыңғыс Әрінов, Алматы қаласының әкімі Ерболат Досаев, ҚХР-дың Алматыдағы Бас консулы Су Фанцю және екі елдің ғылыми қоғамдастық өкілдері қатысты.

Үкіметаралық келісім толық бекітілгенге дейін Ұлттық сейсмологиялық ғылыми орталық базасында үш мамандандырылған зертхана іске қосылды. Бұл тараптарға ғылыми зерттеулерді қазірдің өзінде бастауға мүмкіндік береді.

Ашылу аясында Қазақстанның Ұлттық сейсмологиялық орталығы мен ҚХР Жер сілкіністері жөніндегі әкімшілігінің Геофизика институты геофизика мен сейсмология саласындағы ынтымақтастық туралы меморандумға қол қойды.

Бірлескен жоба сейсмикалық белсенділікті бақылау мен болжаудың заманауи әдістерін енгізуге және екі елдің сейсмикалық қауіпсіздігін арттыруға бағытталған.

Оқи отырыңыз: Алматыдағы жер сілкінісі кезінде неге дабыл жүйесі істемеді