Қарағанды облысында қызметкер өзінің жұмыс орнын тонап кетті

Қарағанды облысында сұлулық салонының қызметкері өз жұмыс орнын тонап кеткен.

Polisia.kz ақпаратына қарағанда, ол жұмыс кестесі мен ақшаның қай жерде тұратынын жақсы білген. Сондықтан сыбайласымен бірге мұқият жоспарлап, қылмысқа барған. Алайда, ең жақсы ойластырылған жоспарлардың өзі күтпеген жерден кесірінен күл-талқан болуы мүмкін екенін ескермеген.

«Салонда оқиғалардың барлық тізбегін түсіріп алған бейнебақылау жүйесі орнатылған. Түнгі жүріс-тұрыс, бөлмеге заңсыз кіру және ақшаны ұрлау – мұның бәрі цифрлық тасымалдағыштарда қалып, айғақ болды. Бұл факт тергеу жұмыстарында шешуші рөл атқарды», – делінген полиция мәліметінде.

Салон иесі таңертең жұмысқа келгенде ірі көлемдегі ақшаның жоғалғанын байқады. Бейнежазбаны көргеннен кейін күдік бірден кассаға тікелей қол жеткізе алатын және қолма-қол ақшаның қайда сақталатынын білетін қызметкерге түсті.

Иесінен толық сипаттама алған полицейлер жедел бағдарлар таратып жіберді. Күдіктілерді қаладан қашып кетпек болған кезінде вокзалдан ұсталған. Қазіргі уақытта қылмыстық іс қозғалып, тергеу жүріп жатыр.

Ал Петропавлда бойжеткен «Қызыл-Жар» мешітінің имамын тонап кеткен. Ол имам кабинетіне кіріп, 36 500 теңгесін ұрлап кеткен.