Алматы, Атырау және Өскеменде ауа сапасы нашарлайды

15 тамызда Қазақстанның үш қаласында ауа сапасы нашарлайды, деп хабарлайды Kursiv.Media. «Қазгидромет» мамандарының мәліметінше, бұған қолайсыз метеорологиялық жағдайлар себеп болып отыр.

Синоптиктердің мәліметінше, Алматы мен Атырауда қолайсыз метеорологиялық жағдай күндіз, ал Өскеменде түнгі уақытта күтіледі.

Мамандардың түсіндіруінше, қолайсыз метеорологиялық жағдай желдің болмауы немесе баяу соғуы, тұман және температуралық инверсия қатар орын алған кезде қалыптасады. Мұндай жағдайда зиянды заттар атмосфераның жерге жақын қабатында жиналып, ауа сапасының төмендеуіне әкелуі мүмкін.

Синоптиктер мұндай кезеңдерде ауа ластануының адам денсаулығына кері әсер ету қаупі артатынын ескертеді. Бұл әсіресе созылмалы аурулары бар адамдар үшін маңызды.

Ауадағы ластану деңгейіне желдің жылдамдығы, жауын-шашын, ауа ылғалдылығы мен температурасы әсер етеді.

Осыған байланысты мамандар тұрғындарға сақтық шараларын ұстануды ескертеді:

• Көшеде, әсіресе көлік көп жүретін жол бойында жүру уақытын азайту.
• Жүкті әйелдер, балалар мен қарттарға ұзақ уақыт серуендемеу.
• Тыныс жолдары, жүрек-қан тамырлары аурулары бар және аллергияға шалдыққан жандарға қажетті дәрі-дәрмектерін өзімен бірге ұстау.
• Ашық ауада спортпен шұғылданатындарға жаттығуды уақытша жабық ғимаратқа ауыстыру.

Еске салайық, 15 тамызда елдің басым бөлігінде аптап ыстық сақталады. Тек шығыс пен батыстың кей аймақтарында жаңбыр жауады.