Алматыда тегін автотұраққа өтініш қабылдау басталды

Алматылықтар көлігін үйіне жақын жерге тегін қоя алады. Қала әкімдігі тұрғындарға тегін автотұраққа өтініш беру басталғанын хабарлады, деп жазады Kursiv.Media.

Мегаполисте жол қозғалысын ұйымдастырудың жаңартылған ережелері күшіне енді. Негізгі өзгерістердің бірі – жақын маңдағы үйлердің тұрғындары үшін абонементтердің қайтарылуы. Енді тұрғындар үйінен 500 метр радиуста орналасқан кез келген автотұрақта бір автокөлікті тегін қою құқығын пайдалана алады. Бұл мүмкіндік көппәтерлі тұрғын үй кешендеріндегі үй-жайлардың меншік иелері мен жалға алушыларына беріледі. Алайда нақты бір автотұрақ орны белгілі бір адамға бекітілмейді.

Сонымен қатар тегін автотұрақ пайдалану құқығы:

• жерасты паркингтеріне;
• көлік қағып алатын автотұрақтарға;
• көпдеңгейлі тұрақтарға;
• механикаландырылған автотұрақтарға қолданылмайды.

Тегін пайдалану құқығын алу үшін өтінішті бүгін, 17 тамыздан бастап «Алматы паркинг» сайты немесе eOtinish порталы арқылы беруге болады.

«Тегін пайдалану құқығы меншік иесімен бірге тұратын жақын туысына оның жазбаша келісімі болған жағдайда берілуі мүмкін. Ал үй-жайларды жалға алушыларға бұл құқық мемлекеттік тіркеуден өткен жалдау шарты негізінде беріледі», – делінген хабарламада.

Кімдер автотұрақты тегін пайдалана алады

Егер үй-жай немесе автокөлік ортақ үлестік меншікте болса, тегін автотұрақ пайдалану құқығы қалған меншік иелерінің жазбаша келісімі болған жағдайда беріледі.

Коммуналдық ақылы автотұрақтарды мына азаматтар тегін пайдалана алады:

• Ұлы Отан соғысының ардагерлері;
• басқа мемлекеттер аумағындағы соғыс қимылдарының ардагерлері;
• жеңілдіктері бойынша ҰОС ардагерлеріне теңестірілген ардагерлер;
• еңбек ардагерлері;
• I және II топтағы мүгедектігі бар адамдар;
• мүгедектігі бар баланың заңды өкілдері;
• «Алтын алқа», «Күміс алқа» иегерлері және көпбалалы аналар;
• Семей ядролық сынақ полигонындағы сынақтардан зардап шеккен азаматтар;
• электромобиль иелері.

Автотұрақта алғашқы 5 минут тегін

Тротуар типіндегі автотұрақтар сағат 08:00-ден 20:00-ге дейін жұмыс істейді. Төлем әр минут үшін алынады. Жолаушыны отырғызу немесе түсіру, сондай-ақ көлікті тиеу не түсіру үшін алғашқы 5 минут тегін. Егер көлік 5 минуттан ұзақ тұрса, жүргізуші тұрақ ақысын алғашқы бес минутты қоса есептегенде, толық уақыт үшін төлеуі керек.

Қазіргі таңда Алматыда 17 мыңнан астам ақылы автотұрақ орны бар. Жыл соңына дейін тағы 8 мыңға жуық автотұрақ ақылы болады.