Түркия шылым тарту бойынша әлемде екінші орынға шықты

Түркияның Денсаулық сақтау министрі Кемаль Мемишоглу бұл ел Индонезиядан кейін шылым тұтыну бойынша әлемде екінші орында тұрғанын мәлімдеді, деп хабарлайды Kursiv.Media.

Министрліктің хабарлауынша, ерлердің 46%-ы шылым шегеді, ал темекі аурулар мен өлім-жітімнің басты себептерінің бірі болып қала береді. Мемишоглу Түркияда сигарет сату көлемі жылына 8 млрд қорапқа жеткенін атап өтті. Ол адамдарды темекі шегуден бас тартуға белсендірек ынталандыруға және аурулардың алдын алуға көбірек көңіл бөлуге шақырды.

«Денсаулық сақтау жүйесінің міндеті – адамдарды ауру пайда болғаннан кейін емдеу ғана емес, сонымен бірге қоғамда алдын алу мәдениетін қалыптастыру», – дейді түрік министрі.

Елдегі өлім-жітімнің 34,7%-ы қан айналымы жүйесінің ауруларымен, тағы 16%-ы қатерсіз және қатерлі ісіктермен байланысты. Шенеунік осы аурулардың себептерінің арасынан темекі шегуді бөле-жара атап, оның жүрек-қан тамырлары ауруларымен, сондай-ақ өкпе және көмей рагымен байланысын баса айтты.

Темекі шегуден бөлек, министр аз қозғалатын өмір салты мен артық салмақты да күрделі мәселелер ретінде атады. Түркия халқының шамамен 30%-ы морбидті семіздіктен зардап шегеді. Себептердің қатарында ол стресті, өмір салтының өзгеруін және тамақтану әдеттерін атап өтті.