Зейнетақы жинағын жеке компаниялардың басқаруына қалай аударуға болады
Қазақстандықтарға зейнетақы жинағын дербес басқаруға мүмкіндік берілмек. Қазіргі кезде азаматтар міндетті және міндетті кәсіптік зейнетақы жарналарының 50 пайызға дейінгі бөлігін, сондай-ақ ерікті жарналардың 100 пайызын инвестициялық портфельді басқарушыға (ИПБ) сенімгерлікке бере алады. Ал 2026 жылғы 7 қыркүйектен бұл шектеу толығымен жойылып, зейнетақы жинағындағы қаражатты 100 пайыз ИПБ-ға аударуға болады.
Егер салымшы сақтандыру компаниясымен зейнетақы аннуитеті шартын жасасқан болса, жинақтарын қазірдің өзінде толық көлемде аударуға құқылы.
Мұндай қадам салымшыларға өз капиталын ұзақ мерзімге тиімді орналастырып, табысын арттыруға жол ашады.
Инвестициялық компанияны таңдау – әр салымшының жеке шешімі. Бұл орайда мемлекет қауіпсіздік талаптарын өте жоғары қойып отыр.
Зейнетақы активтерін басқаруға тек Қаржы нарығын реттеу және дамыту агенттігінің (ҚНРДА) арнайы тізіміне енген сенімді компаниялар ғана жіберіледі.
Бұл ұйымдардың арнайы лицензиясы, нарықтағы мол тәжірибесі, оң қаржылық көрсеткіштері және ықтимал шығындарды жабатын жеткілікті меншікті капиталы болуы шарт. Сонымен бірге, олар БЖЗҚ-мен және кастодиан-банкпен арнайы келісімшарттар жасайды.
Қазіргі уақытта бұл талаптарға «Alatau City Invest», «BCC Invest», «Halyk Finance», «Сентрас Секьюритиз» және «Tansar Capital» сияқты саусақпен санарлық қана ірі компаниялар сай келеді.
Ал «Halyk Global Markets» АҚ келісімшартты бұзатынын хабарлағандықтан, БЖЗҚ 2026 жылдан бастап бұл компанияға жаңа өтініштер қабылдауды тоқтатты.
Егер қандай да бір компания тізілімнен шығарылса, салымшылардың қаражаты бірден Ұлттық Банктің басқаруына қайтарылады, бұл жинақтардың амандығына кепілдік береді.
Қаржыны қалай аударуға болады
Дұрыс таңдау жасау үшін БЖЗҚ-ның invest.enpf.kz арнайы интернет-платформасы жұмыс істейді.
Мұнда ай сайын компаниялардың қаржылық көрсеткіштері, табыстылығы, инвестициялық портфель құрылымы мен активтер көлемі ашық жарияланып отырады. Порталда компаниялардың кірістілігін, шартты бірлік құнын (УЕ) және стратегияларын өзара салыстыру өте ыңғайлы.
Жинақты УИП-қа аудару процесі өте қарапайым әрі толық автоматтандырылған. Салымшы порталдағы тізілімнен өзіне ұнаған компанияны таңдап, enpf.kz сайтындағы жеке кабинеті арқылы ЭЦҚ көмегімен немесе БЖЗҚ бөлімшесіне барып өтініш береді.
Аударымның мәртебесін мобильді қосымшадан тікелей бақылауға болады.
Қордың ақпараттық жүйелері кез келген көлемдегі қаражатты өңдеуге және бірнеше портфельді қатар есепке алуға толықтай дайын.
1998 жылы жинақтаушы зейнетақы жүйесі енгізілгеннен бері жиналған инвестициялық табыс 1 109,05%-ға жеткен.
