4317 метр биіктікте жағдайы нашарлаған жасөспірімге құтқарушылар көмектесті

Алматы облысында Сатпаев шыңына әкесімен бірге көтерілген жасөспірімнің тауда жағдайы нашарлап, өздігінен қозғала алмай қалған. Құтқарушылар оны 4317 метр биіктіктен түсіріп, дәрігерлерге тапсырды, деп хабарлайды Kursiv.Media.

Оқиға Қарасай ауданында болған. Жасөспірім әкесімен бірге тауға көтерілген кезде басы ауырып, басы айналған. Жағдайына байланысты әрі қарай өздігінен қозғала алмаған.

ҚР Төтенше жағдайлар министрлігінің «Барыс» республикалық құтқару қызметінің мамандары туристерді Сатпаев шыңының 4317 метр биіктігіндегі ауданынан тапқан.

Құтқарушылар алғашқы көмек көрсетіп, жасөспірім мен оның әкесін таудан төмен түсіре бастаған. Туристер Үлкен Алматы көлі аумағына дейін жеткізіліп, сол жерде Апаттар медицинасы орталығының бригадасына тапсырылды.

Медициналық көмек көрсетілгеннен кейін жасөспірім ауруханаға жатқызу үшін Балалар шұғыл медициналық көмек орталығына жеткізілді.

Қазіргі уақытта оның жағдайы қанағаттанарлық. Алдын ала диагноз бойынша жасөспірімде тау ауруы белгілері болған.

Оқи отырыңыз: Құтқарушылар Алматы тауларынан адамның мәйітін түсірді.