Сот Эпштейннің сыбайласын 20 жылға түрмеде қалдырды

Нью-Йорктегі Федералды сот атышулы финансист Джеффри Эпштейннің ісі бойынша Гислейн Максвеллге кесілген үкімнің күшін жоюдан бас тартты. Ол түрмеде қалып, 20 жылдық жазасын өтеуді жалғастырады, деп хабарлайды Кursiv.Media.

Reuters ақпаратына сүйенсек, шешімді 25 тамызда судья Пол Энгельмайер шығарды. Ол Максвеллдің уәждерінің негізсіз екенін және олардың басым бөлігін сот бұған дейін қарап қойғанын мәлімдеді.

Максвелл кәмелетке толмағандарды жыныстық қанау туралы Эпштейн ісінің материалдарын жариялау заңы аясында жарық көрген құжаттарға сүйеніп, үкімнің күшін жоюға тырысты. Ол жаңа мәліметтер өзінің кінәсіне күмән тудыруы мүмкін деп шағымданды.

Дегенмен судья керісінше тұжырымға келді.

«Бұл материалдардың іске қатысы бар деңгейде олар оны ақтамайды, керісінше, оның қатыстылығын растайды», — деп жазды Энгельмайер 67 беттік шешімінде.

Максвелл сонымен қатар прокуратура айғақтардың бір бөлігін жасырды, ал жәбірленушілердің адвокаттары іс жүзінде айыптау тарапының өкілдері ретінде әрекет етті деп мәлімдеді. Сот бұл уәждерді де кері қайтарды.

Алқабилер Максвеллді 2021 жылдың желтоқсанында кінәлі деп тапты. Тергеу мәліметтері бойынша, 1994–2004 жылдары ол Эпштейнге кәмелетке толмаған қыздарды жыныстық қанау үшін табуға және дайындауға көмектескен.

Бұған дейін Максвелл үкімге шағымдануға әрекет жасаған болатын. АҚШ Жоғарғы соты оның шағымын 2025 жылдың қазанында кері қайтарды.

Қазіргі уақытта ол Техастағы режимі төмендетілген федералды түрмеде отыр. Максвелл 2037 жылдың шілдесінен ерте бостандыққа шыға алмайды — ол кезде ол 75 жасқа толады.

Джеффри Эпштейн — ең резонансты қылмыстық істердің бірінің фигурантына айналған америкалық қаржыгер.

2008 жылы ол кәмелетке толмаған қызды жезөкшелікке тарту ісі бойынша кінәсін мойындап, бас бостандығынан айырылды. 2019 жылы Эпштейн адам саудасы және қыздарды жүйелі түрде сексуалдық қанауға тарту айыптары бойынша қайта ұсталды. Үкім шыққанға дейін ол тергеу изоляторында өзіне қол жұмсады.

2026 жылғы 30 қаңтарда АҚШ-та Эпштейнге қатысты архивтік материалдардың жаңа бөлігі — хат алмасулар, фотосуреттер мен бейнежазбалар жарияланды.

Бұған дейін жарияланған материалдар Эпштейннің бірқатар танымал тұлғалармен, соның ішінде Ұлыбритания ханзадасы Эндрюмен байланысы болғанын көрсетті. Бұған қоса, іс бойынша Билл Гейтс Конгресс комиссиясында жауап берген еді.