Оралда үй-күйсіз адамдарды дропперлікке тартқандар ұсталды

Оралда белгілі бір тұрғылықты жері жоқ 40-қа жуық адамды дропперлік схемаға тартты деген күдікті ұсталды, деп хабарлайды Кursiv.Media.

Polisia.kz ақпаратына сүйенсек, тергеу барысында ер азаматтың баспанасыз адамдарды тауып, оларға ақша ұсыну арқылы банктік шоттар мен карталар ашып, верификациядан өтуді және кіру мүмкіндігін өзіне беруді ұсынғаны анықталды.

Полиция жалпы 40-қа жуық дропперді анықтады. Олардың банктік шоттары мен карталары алаяқтардың азаматтардан интернет арқылы ұрлаған ақшаларын аудару үшін пайдаланылған.

Тінту кезінде күдіктіден 732 мың теңге, 14 телефон, SIM-карталар, банктік карталар табылды.

Факт бойынша қылмыстық іс қозғалды. Сот күдіктіні қамауға алуды шешті.

Тергеу жалғасуда.

Айта кетейік, 2025 жылғы қыркүйектен бастап дропперлік қылмыс саналады. Өзінің есепшоты мен банк картасын бөтен адамға берген адамдар қылмыстық жауапкершілікке тартылатын болады.