Алматы облысындағы 21 жастағы қыздың жұмбақ өлімі – туыстары ресми нұсқаға сенбейді

29 маусымда Алматы облысы Ұзынағаш ауылында 21 жастағы қыздың денесі табылды. Қыздың туыстары өзіне қол жұмсады деген нұсқаға күмән келтіреді.

Kriminal Kazakhstan ақпаратына қарағанда, жақындары оны өлтірген болуы мүмкін деп есептейді.

Анасының айтуынша, оқиғаның қарсаңында Диана оған сыйлықтар жасап, сұлулық салонына апарған және концертке билет сатып алған. Жұмыстан кейін қыз ағасына баруды жоспарлаған. Алайда түнде хабарсыз кеткен.

Отбасы марқұмның денесінде көптеген көгерген іздер болғанын айтады. Сондай-ақ жақындарының сөзінше, оның сөмкесінен 100 мың теңге, ал мойнынан алтын алқасы жоғалған. Диананың жеке заттарын туыстары кейін жырадан тауып, тергеушіге тапсырған.

Туыстары сонымен қатар дәретхана жанында екі көлік пен төрт жігітті көрген болжамды куәгерге сілтеме жасайды.

Полиция бұл дерек бойынша «Өзін-өзі өлімге дейін жеткізу» бабымен қылмыстық іс қозғалғанын хабарлады. Тергеу жұмыстары жалғасуда.

Сондай-ақ 14 шілдеде Абай облысындағы Бородулиха ауылында 20 жастағы қыздың мәйіті табылды. Оның денесі бірнеше жерден пышақталған.