Кеген ауданында екі шағын су электр станциясы салынады
Алматы облысының Кеген ауданында электр тапшылығын азайту үшін екі шағын су электр станциясын салу жоспарланып отыр. Жобалардың бірі іске асырыла бастады, екіншісіне 11 млрд теңге инвестиция тартылмақ.
Алғашқы станция Алғабас ауылында салынып жатыр. Жобаны Kegen Hydro компаниясы жүзеге асырады. Қазір жер қазу жұмыстары аяқталып, су арнасын бекітуге және станция ғимаратын тұрғызуға дайындық басталған.
Осы ауылда қуаты 10 МВт болатын тағы бір шағын СЭС салу көзделген. «Осирис Энерго» компаниясы жобаға 11 млрд теңге инвестиция салмақ.
Облыс әкімдігі инвесторларға құрылыс жұмыстарына жергілікті тұрғындарды көбірек тартуды тапсырды. Бұл жобалар ауданға электр энергиясымен бірге жаңа жұмыс орындарын да әкелуі мүмкін.
Қазақстанда шағын гидроэнергетиканы дамытуға арналған 32 нысан іріктелген. Бұған қоса, 2026 жылғы шілдеде Үкімет гидроэнергетика саласын 2035 жылға дейін дамыту жоспарын бекітті.
