Ауруханаға түсіп қалған адамның жақындарына хабар беретін сервис ашылды

Шұғыл емдеуге жатқызылған адамның туыстарына хабарлама жіберетін жаңа тегін сервис іске қосылды, деп хабарлайды Kursiv.Media.

Денсаулық сақтау министрлігінің хабарлауынша, бұл қызмет eGov.kz электрондық порталы және eGov Mobile мобильдік қосымшасы арқылы көрсетіледі.

«Егер адам жол-көлік оқиғасына ұшыраса, өзін кенеттен нашар сезінсе немесе басқа да себеппен ауруханаға түсіп, жақындарына өз бетінше хабарласа алмаса, енді оның емдеуге жатқызылғаны туралы өзі алдын ала таңдаған жақын адамдары хабардар бола алады. Осы мақсатта eGov порталында «Емдеуге жатқызылған жағдайда хабарлау үшін сенім білдірілген байланыстарды тіркеу» жаңа қызметі пайда болды», – деп хабарлады министрлік.

Пайдаланушы емдеуге жатқызылған жағдайда хабарлама жіберілетін үш сенім білдірілген адамды көрсете алады. Жаңа сервис Қазақстан Республикасы Денсаулық сақтау министрлігі мен Қазақстан Республикасы Жасанды интеллект және цифрлық даму министрлігінің бірлескен жұмысы шеңберінде іске асырылды.

Айта кететін жайт, енді жүктілік пен босануға байланысты әлеуметтік төлемді Kaspi.kz мобильді қосымшасы арқылы рәсімдеуге болады. Бұл туралы Еңбек және халықты әлеуметтік қорғау министрлігі хабарлады.