Риддерде аюлар саяжайға кіріп, тұрғындарды шошытып жатыр

Шығыс Қазақстандағы аюлар қысқа қажетті май қорын жинау үшін бұрынғыдан да белсенді бола түскен деп хабарлайды Kursiv.Media.

Halyqstan ақпаратына қарағанда, орманда азық азайғандықтан, аюлар тамақ іздеп саяжайлар мен жеке секторларға кіріп, қоршауларды бұзып жүр. Бақшаларды бүлдіріп, алма жеп кететін жағдайлар да жиілеген.

Аю тамыз айынан бері ауылды торып жүр

Жақында Шаравка ауданындағы саяжайлардың біріне түнде аю кіріп кеткен. Оқиға жеке үйге орнатылған бейнебақылау камерасына түсіп қалған.

Аңды байқаған үй иесі оны дыбыс арқылы үркітуге тырысқан. Бірақ аю одан сескенбеген. Ол алма ағашының маңынан тек ауладағы жарық шамы қосылғаннан кейін ғана кетіп қалған.

Саяжай тұрғындарының айтуынша, Шаравка маңында аю тамыз айының ортасынан бері жүр. Оның іздері түрлі жерден байқалады. Бірнеше күн бұрын Риддер тұрғыны Галинаға тиесілі аулаға да аю кіріп, қоршауды бұзып, алма ағашын сындырған. Бұл оқиға да түнде болған.

Жедел жасақ жіберілді

Аюлардан шалғай орналасқан Төртінші ауданның тұрғындары да қауіптеніп отыр. Соңғы күндері бұл маңда жабайы аңдардың елді мекенге бірнеше рет жақындағаны тіркелген. Аюдың адамға шабуыл жасау қаупі де бар. Бұған дейін Риддерде аю шабуылынан ер адам ауыр жарақат алған еді.

Тұрғындардың шағымы көбейіп, халық алаңдаулы болғандықтан, Риддерге Шығыс Қазақстан облысының Табиғи ресурстар және табиғат пайдалануды реттеу басқармасына қарасты орман және аңшылық шаруашылығының жедел әрекет ету жасағы қайта жіберілді.

«Тұрғындардан жүргізіліп жатқан жұмыстарға түсіністікпен қарап, мамандардың қызметіне кедергі келтірмеуді сұраймыз», — деп хабарлады қала әкімдігі.

Аюлардың саны көп болғандықтан, бұл жолы қалаға инспекторлардың бірден үш экипажы жіберілген.

Мұның алдында өңірде мамандар елдімекендерге жақын орналасқан аумақтарда аюдың жүрген-жүрмегенін тексерген еді. Бұл туралы Черемшан орман шаруашылығы хабарлаған.