Ақтауда он мың көрерменге арналған стадионның құрылысы басталды

Ақтауда жаңа көпфункционалды стадион құрылысының дайындық кезеңі басталды. Қазіргі уақытта алаңда шұңқыр қазу, абаттандыру және құрылыс процесін ұйымдастыру жұмыстары жүргізіліп жатыр, деп хабарлайды Kursiv.Media.

«Бүгінде нысанда маңызды дайындық кезеңі жүріп жатыр. Алғашқы кезеңдерден бастап қажетті қарқынды, сапаны қамтамасыз ету маңызды. Стадион Ақтау мен бүкіл өңір үшін маңызды нысанға айналады, сондықтан құрылыс тиісті деңгейде жүргізілуі тиіс», — деп атап өтті облыс әкімі Нұрдаулет Қилыбай.

Спорт кешені бұрынғы президент резиденциясының аумағында бой көтергелі тұр. Учаскенің жалпы ауданы 17,29 гектарды құрайды. Негізгі стадион 10 мың көрерменге арналған. Өлшемі 105 × 68 метр болатын футбол алаңы табиғи көгалмен, жылыту жүйесімен және жер асты дренажымен жабдықталады.

Стадионды Қазақстан футбол федерациясының 5-санаты және UEFA-ның 4-санаты бойынша сертификаттау жоспарланып жатыр.

Кешен құрамына 40 орындық жатақханасы бар футбол академиясы да кіреді. Аумақта 600 және 400 көрерменге арналған трибуналары бар екі жаттығу алаңы, автотұрақ, бақылау-өткізу пунктері, сондай-ақ инженерлік және қосалқы нысандар қарастырылған.

Стадионның архитектуралық тұжырымдамасы Ақтаудың Каспий теңізі жағалауында орналасуын ескере отырып әзірленген. Ғимараттың сыртқы келбетінде заманауи сәулеттік шешімдер мен Маңғыстаудың табиғаты мен мәдениетіне байланысты мотивтер пайдаланылған.

Облыс әкімі жауапты тұлғаларға құрылыс барысына, жұмыс сапасына және белгіленген мерзімдердің сақталуына тұрақты бақылауды қамтамасыз етуді тапсырды.