Алматыда жылу жүйесі тексерістен өтеді: қала әкімдігі тұрғындарға ескерту жасады

Алматыда жаңа жылыту маусымына дайындық аясында жылу желілерін қорытынды гидравликалық сынақтан өткізу жұмыстары басталады. Бұл туралы Kursiv.Media Алматы әкімдігіне сілтеме жасап хабарлайды. Тексеру 9-18 қыркүйек аралығында күн сайын таңғы сағат 04:00-ден 07:00-ге дейін жүргізіледі.

«Алматы жылу жүйесі» ЖШС мамандарының хабарлауынша, бұл шаралар қысқы кезеңде тұрғындарды үздіксіз әрі сапалы жылумен қамтамасыз ету үшін маңызды.

Сынақ өткізілетін аумақтарда ыстық сумен жабдықтау шектелмейді, қалыпты режимде сақталады.

Тұрғындардың қауіпсіздік ережелері

Мамандар сынақ кезінде құбырлардағы қысымның артуына байланысты су ағып, жол жабынының ішінара немесе уақытша зақымдануы мүмкін екенін ескертеді.

Осыған байланысты «Алматы жылу жүйесі» ЖШС қала тұрғындары мен қонақтарынан қауіпті учаскелерге жақындамауды және өз бетінше әрекет жасамауды сұрайды.

Жылу желілерінде ақау немесе штаттан тыс жағдайлар байқалған жағдайда бірден төмендегі нөмірлерге хабарласуға болады: 109 – бірыңғай байланыс орталығы, +7 (727) 351-27-62 – диспетчерлік қызмет.

Бұған дейін, Астанада жылу маусымын тұрақты өткізу үшін ЖЭО-лар мен жылу желілерін жаңарту жұмыстары басталған еді.