Тоқаев Дүниежүзілік кеден ұйымының Бас хатшысын «Достық» орденімен марапаттады

Президент Қасым-Жомарт Тоқаев Ақордада Дүниежүзілік кеден ұйымының (ДКҰ) Бас хатшысы Иэн Сондерсті қабылдады. Кездесу барысында Президент екіжақты серіктестік пен достық байланыстарды нығайтуға қосқан зор үлесі үшін Иэн Сондерсті II дәрежелі «Достық» орденімен марапаттады, деп хабарлайды Kursiv.Media Ақордаға сілтеме жасап.

Кездесуде Қазақстан мен Дүниежүзілік кеден ұйымы арасындағы 30 жылдан астам уақыт бойы табысты ілгерілеп келе жатқан өзара тиімді ынтымақтастықты одан әрі тереңдету мәселелері талқыланды.

Кеден саласын цифрландыру мен «ақылды шекара»

Президент Қасым-Жомарт Тоқаев ДКҰ-мен ынтымақтастық еліміздегі кеден заңнамасын жетілдіруде және кедендік әкімшілендіру тиімділігін арттыруда маңызды рөл атқаратынын атап өтті.

Мемлекет басшысының айтуынша, Қазақстан Еуразиядағы көлік қатынасын нығайтуға және жүк тасымалына қолайлы жағдай жасауға белсенді атсалысып келеді. Осы орайда елімізде: «Ақылды шекара» (Smart Border) моделі дәйекті түрде дамып жатыр. Кедендік рәсімдерді оңтайландыру мен ашықтықты қамтамасыз ету үшін заманауи цифрлық шешімдер кеңінен енгізіліп отыр.

Өз кезегінде Иэн Сондерс Дүниежүзілік кеден ұйымы мен Қазақстан арасындағы қарым-қатынастың жоғары қарқынын ерекше атап өтті.

Ол еліміздің кедендік әкімшілендіру ісін заман талабына сай жетілдіруде, озық технологияларды қолдануда және тиісті мемлекеттік органдардың институционалдық құзыретін нығайтуда елеулі табыстарға жеткенін жоғары бағалады.

Өңірлік логистика және әлемдік сауда

Кездесу соңында тараптар әлемдік саудадағы қазіргі сын-қатерлер мен жаһандық тенденциялар төңірегінде пікір алмасты.

Сондай-ақ сауда-экономикалық байланыстарды кеңейту мен Орталық Азия өңірінің көлік-логистикалық әлеуетін арттырудың болашақ перспективаларына айрықша назар аударылып, серіктестікті одан әрі нығайтуға дайын екендіктерін растады.

Бұған дейін, Тоқаев Бразилия президентін Тәуелсіздік күнімен құттықтаған еді.