АҚШ-тағы AI-энергия дағдарысы Қазақстанға қалай әсер етеді

Жасанды интеллектінің дамуына электр энергиясының тапшылығы емес, электр желісінің өзі шектеу жасауы мүмкін,  деп хабарлайды Кursiv.Media.

22 шілдеде әлемдегі дата-орталықтардың ең ірі шоғырланған аймағы саналатын АҚШ-тың Ашберн қаласында электр беру желісіндегі ақау бірнеше секунд ішінде 3 ГВт-тан астам жүктемені ажыратып тастады. Ал екі жыл бұрын сол жерде бір жабдықтың істен шығуы жалпы қуаты 1,5 ГВт болатын шамамен 60 нысанды электр желісінен ажыратқан.

AI-дата-орталықтары энергия тұтынушылардың жаңа бір түрін қалыптастырып жатыр. Қазіргі заманғы есептеу кампустары бірнеше миллисекунд ішінде өз жүктемесін 70%-ға дейін өзгерте алады.

Ал электр желілері жүктеме көлемі 50 МВт болса, оның өзі ірі көрсеткіш саналатын дәуірде жобаланған. Қазіргі жаңа AI-кампустары болса гигаватттық масштабқа шығып жатыр.

Жаңа электр генерациясын салып, қосымша мегаватттар алуға болады. Бірақ сол энергияны дата-орталыққа сенімді түрде жеткізу, тұтынудың күрт өзгерістеріне төтеп беру және сонымен қатар бүкіл энергожүйе үшін қауіп тудырмау қажет.

Осыдан AI жарысының экономикасы да өзгеріп жатыр.

Электр энергиясына қолжетімділік әлі де маңызды. Бірақ барған сайын электр желілерінің, қосалқы станциялардың, энергия сақтау жүйелерінің және жаңа қуаттарды электр желісіне қосу жылдамдығының құны артып келеді.

Tengenomica сарапшылары егер Қазақстан ірі дата-орталықтарды тартқысы келсе, электр энергиясының болуы бірінші шарт болатынын айтады.

Екінші шартқа энергожүйенің гигаватттық қуаттағы цифрлық өндірістерді қабылдай алуы жатады.

AI инфрақұрылымы үшін бәсекелестік біртіндеп энергетикалық жүйелер арасындағы бәсекелестікке айналып келеді.

Капитал дата-орталыққа бір уақытта жеткілікті қуат, жоғары сенімділік және жылдам қосылу мүмкіндігін бере алатын жерге бағытталады.

Тағы да оқыңыз: Қандай компаниялар энергияны көп тұтынады