Үкімет Ақтөбедегі футбол стадионының құрылысына 6,5 млрд теңге бөлмек

Ақтөбедегі футбол стадионының құрылысына 6,5 млрд теңге бөлінеді деп хабарлайды Kursiv.Media.

Жаңа стадион 35 мың көрерменге арналған. Қаланың батыс бөлігіндегі 25 гектар аумақта орналасады. УЕФА-ның 4-деңгей талаптарына сай жобаланған бес қабатты кешеннің жалпы аумағы 80 мың шаршы метрден асады.

Нысанда футбол алаңы мен көрермендер трибуналарынан басқа командалар мен бұқаралық ақпарат құралдарының өкілдеріне арналған инфрақұрылым болмақ.

Жоба үш кезеңмен жүзеге асырылады. Құрылыс жұмыстарын 2028 жылдың қыркүйегінде аяқтау жоспарланған. Жаңа арена «Ақтөбе» футбол клубының жанкүйерлеріне және халықаралық матчтар өткізуге мүмкіндік береді.

Ақтөбенің қазіргі орталық стадионы 1975 жылы салынған және шамамен 13 мың көрерменге есептелген. Дегенмен «Ақтөбе» ФК-нің өз алаңында өткізетін матчтарына деген жанкүйерлердің қызығушылығы артып, кейде ойындарды көргісі келетіндер саны аренаның көлемінен үш есе асып кетіп жатады. Сондықтан жаңа стадион салу қажеттілігі туындады.

Спорт кешенінің құрылысы басталатыны жайлы былтыр күзде хабарланған еді.