Петропавл маңынан екі адам мен ежелгі мүйізтұмсықтың қаңқасы табылды

Жұмысшылар Петропавлға жақын маңдағы Прибрежное ауылынан екі адам мен ежелгі жануардың қаңқасын тапты, деп хабарлайды Kursiv.Media «Жетінші арнаға» сілтеме жасап.

Жұмысшылар сүйектерді көпір құрылысы кезінде тапқан. Экскаватор құм карьерінен топырақ қазып жатқан кезде жер астынан сүйектер байқалған. Табылған заттар сыртқа шығарылып, оқиға орнына полиция шақырылды.

Құқық қорғау органдары тексеру жұмыстарын бастады. Алдын ала мәлімет бойынша, қылмыстық сипаттағы белгілер анықталмаған, ал адам сүйектерінің қай кезеңге жататыны әзірге анықталған жоқ.

Табылған сүйектердің бірін тарих ғылымдарының кандидаты, археолог Анатолий Плешаков зерттеді. Оның алдын ала болжамынша, ол шамамен біздің заманымызға дейінгі XII мыңжылдыққа дейін осы аумақта мекендеген жүнді мүйізтұмсыққа тиесілі.

«Мұндай жануарлар палеолит дәуірінде өмір сүріп, шамамен біздің дәуірімізге дейінгі XII мыңжылдыққа қарай жойылып кеткен», – деді ол.

Енді мамандарды адам сүйектері де сол кезеңге жата ма деген сауал қызықтырып отыр.

Айтуынша, табылған бас сүйектердің кем дегенде бірі сол дәуірге жататыны анықталса, бұл археология үшін аса маңызды жаңалық болуы мүмкін.

«Егер осы бас сүйектердің ең болмаса бірі сол кезеңге тиесілі болып шықса, бұл нағыз сенсация болар еді», – деді археолог.

Енді ғалымдар адам сүйектерінің жасын анықтауы тиіс. Мамандар табылған сүйектер мен құм карьерінің өзін егжей-тегжейлі зерттеуді жоспарлап отыр.