БАҚ: Нұрсұлтан Назарбаевтың ұлы Тауман Назарбаев Астанада үйленгелі жатыр

Нұрсұлтан Назарбаев пен Әсел Исабаеваның үлкен ұлы, 21 жастағы Тауман Назарбаев Астанада үйлену тойына дайындалып жатыр. Бұл туралы Ulysmedia.kz хабарлады.

The Ritz-Carlton-дағы той

Басылымның мәліметінше, салтанатты шара The Ritz-Carlton, Astana мейрамханасында өтеді деп жоспарланған. Тауманның қалыңдығы бұрынғы Индустрия және инфрақұрылымдық даму вице-министрлерінің бірінің қызы. Алайда бұрынғы жоғары лауазымды шенеуніктің тегі жарияланған жоқ.

Дереккөздердің хабарлауынша, салтанатты шараға байланысты қауіпсіздік шаралары барынша күшейтілген. Мейрамхана айналасындағы аумақ той қарсаңында-ақ қоршауға алына бастаған.

Шақырылған қонақтардың қатарында ірі бизнес өкілдері мен саясаткерлер, соның ішінде Назарбаевтың президенттігі кезінде ықпалды қызметтер атқарған тұлғалар бар.

Отбасы туралы не белгілі?

Тауман Назарбаев 2005 жылы дүниеге келген. Оның анасы Әсел Исабаева көпшілікке Әсел Құрманбаева деген есіммен де танымал.

Нұрсұлтан Назарбаевтың бұл отбасы туралы ұзақ уақыт бойы ресми ақпарат айтылмай келді. Тек 2023 жылы Қазақстанның тұңғыш президенті өзінің «Менің өмірім» атты мемуарында алғаш рет ашық жазған болатын. Назарбаевтың айтуынша, ол Әселмен мұсылманша неке қиған. Ортақ некеден екі ұл дүниеге келген: Тауман (2005 ж.) және Бәйкен (2008 ж.).