Роботқа арналған жабдығы бар «Прогресс» ғарыш кемесі Байқоңырдан ұшырылды
«Прогресс МС-35» жүк кемесі Байқоңырдан Халықаралық ғарыш станциясына (ХҒС) қарай жолға шықты, деп хабарлайды Кursiv.Media.
Зымыран экипажға қажетті қорлармен бірге қашықтан басқарылатын роботқа арналған эксперимент жабдығын да ала кетті.
«Союз-2.1б» зымыранын ұшыру 16 қыркүйекте Мәскеу уақытымен 16:34-те (Астана уақытымен 18:34-те) 31-ші алаңның ұшыру кешенінен жүзеге асырылды. «Роскосмос» кеменің белгіленген орбитаға штаттық режимде шыққанын, зымыранның үшінші сатысынан бөлініп, күн батареялары мен антенналарын ашқанын хабарлады.
«Прогресс МС-35» жалпы есебімен 2,4 тоннадан астам жүк жеткізеді. Олардың қатарында:
- 842 кг отын;
- 420 кг су;
- 50 кг оттегі;
- 275 кг азық-түлік;
- Дәрі-дәрмектер, гигиеналық құралдар, станция жұмысына қажетті жабдықтар мен шығын материалдары.
Жүктің бір бөлігі, соның ішінде «Теледроид» ғылыми эксперименттеріне арналған.
Эксперимент аясында ғарышкерлер антропоморфты роботтың ашық ғарышта қашықтан басқару арқылы жекелеген операцияларды орындай алатынын тексермек.
Ол үшін станцияға арнайы ғарышкердің жұмыс орны – экзоскелет жіберілді. Оның көмегімен оператор роботтың қозғалысын басқара алады. «Роскосмос» ғарышкері Анна Кикина оператор ретінде жұмыс істеуге дайындықтан өткен.
«Теледроидтың» өзі ХҒС-қа келесі жүк кемесімен жеткізіледі.
Эксперимент барысында экипаж роботтың сақтау орнынан заттарды ала алуын, ғарышкерге құралды беріп, онымен әртүрлі операцияларды орындау қабілетін тексеруді жоспарлап отыр.
«Прогресс МС-35» кемесінің станцияның ресейлік сегментіндегі «Поиск» модулімен түйісуі Мәскеу уақытымен 19 қыркүйекте сағат 16:46-ға (Астана уақытымен 19:19 қыркүйекте сағат 19:46-ға) жоспарланған.
Айта кетейік, осыған дейін кеменің қалай дайындалып жатқаны туралы жазған едік.
