Қазатомөнеркәсіп Қызылорда облысында уран барлау жұмыстарын жүргізеді
«Қазатомөнеркәсіп» Ұлттық атом компаниясы» Қызылорда облысында орналасқан Қызылту учаскесінде 6 жыл мерзімге уранды барлауға жер қойнауын пайдалану құқығын алды. Осы учаскеге жер қойнауын пайдалану құқығы тек Қазатомөнеркәсіпке тиесілі, деп хабарлайды kursiv.media.
Алдын ала бағалаулар бойынша учаскедегі уран ресурстары шамамен 10 мың тоннаны құрауы мүмкін. Жақын арада ресурстарды нақтылау және учаскенің әлеуетін бағалау үшін геологиялық барлау жұмыстарын жүргізу жоспарда бар.
«Қызылту учаскесінде уран барлауға лицензия алу – бұл біздің минералды-шикізат базасын кеңейту жөніндегі стратегияны іске асырудағы кезекті қадам, – деп атап өтті Қазатомөнеркәсіптің Басқарма төрағасы Мейіржан Юсупов.
Сондай-ақ «Қазатөмөнеркәсіп» Ресейден күкірт қышқылын экспорттау тәртібінің өзгеруіне қатысты пікір білдірді. Компанияның мәліметінше, жаңа шаралар экспортқа тыйым салмайды, тек экспорт көлемін мақұлдаудың жаңартылған тәртібін көздейді. Бұл тәртіп 2026 жылғы 31 желтоқсанға дейін қолданылады.
Ресейден күкірт қышқылының экспорты Үкімет төрағасының немесе оның орынбасарларының шешімдері бойынша, сондай-ақ халықаралық транзиттік тасымалдар мен үкіметаралық келісімдер шеңберінде мүмкін болады.
Ресейлік жеткізушілер «Қазатөмөнеркәсіппен» 2026 жылға арналған қолданыстағы келісімшарттарды толық көлемде орындауға дайын екендігін растады. Олар экспортқа рұқсат алу үшін қажетті құжаттарды тапсырып қойды.
