Бұрынғы әйелін өртеп жіберемін деп қорқытқан астаналық сотталды

Астанада ер адам бұрынғы әйелін өртеп жіберемін деп қорқытқаны үшін 60 сағат қоғамдық жұмысқа тартылды, деп хабарлайды Kursiv.Media.

Елорда прокуратурасының мәліметінше, ер адам қызғаныштан бұрынғы серігінің жұмыс орнына жанғыш сұйықтық құйылған бөтелкемен барған. Ол әйелмен қарым-қатынасты қайта орнатуға тырысып, оны өртеп жіберемін деп қорқытқан. Кейін әйелдің үстіне жанғыш сұйықтық төгіп, оның өміріне қауіп төндірген.

Сот отырысында мемлекеттік айыптаушы ер адамның кінәсін дәлелдейтін материалдарды ұсынды. Сот 60 сағат қоғамдық жұмыс жазасынан бөлек, сотталған адамның мінез-құлқына арнайы талаптар қойды.

Атап айтқанда, оған жәбірленушіге жақындауға тыйым салынды.

Сот үкімі әзірге заңды күшіне енген жоқ.

Прокуратура азаматтарды қауіп төнген жағдайда құқық қорғау органдарына дереу жүгінуге шақырды. Ведомство қорқыту, қудалау және азаматтардың өміріне, денсаулығына немесе қол сұғылмаушылығына қарсы өзге де әрекеттер заң бойынша жауапкершілікке әкелетінін еске салды.

Еске салайық, сталкингке қатысты бап Қылмыстық кодекске 2025 жылы енгізілген. ІІМ мәліметінше, жыл басынан бері сталкинг бойынша 11 мыңнан астам адам қамауға алынды.