Президент Қауіпсіздік Кеңесі аппаратының алғашқы кеңесін өткізді

Қауіпсіздік кеңесінің төрағасы Қасым-Жомарт Тоқаев дербес мемлекеттік орган мәртебесіне ие болған Қауіпсіздік кеңесі аппаратының алғашқы кеңесін өткізді деп хабарлайды Kursiv Media.

Президент Аппараттың жаңа мәртебесін мемлекеттік институттарды реформалау үдерісімен байланыстыра қарау қажет екенін айтты. Оның пікірінше, әлемдегі ахуалдың құбылмалы кезеңінде Қауіпсіздік кеңесі маңызды мәселелер бойынша жан-жақты талдау жасап, нақты шешімдер қабылдайтын орталыққа айналуға тиіс.

Президент қазіргі сын-қатерлердің сипаты өзгеріп жатқанын атап өтті. Осыған байланысты киберқауіпсіздік пен жасанды интеллектіні қолдану мәселелеріне ерекше назар аударылды. Сонымен қатар ақпарат, технология, азық-түлік, су және энергетика қауіпсіздігі алдағы уақытта өзектілігі арта түсетін бағыттар ретінде аталды.

Кеңес қорытындысы бойынша Аппаратқа бірқатар нақты міндет жүктелді. Президент Қауіпсіздік кеңесі жұмысының тиімділігін бағалауда Қазақстанның ұлттық мүддесін, егемендігі мен тұрақтылығын қорғау негізгі өлшем болуға тиіс екенін атап өтті.

Оқи отырыңыз: Қауіпсіздік Кеңесінің Аппараты дербес мемлекеттік орган болды