Қазақстан қор биржасында доллар бағамы осы аптада 447,90 теңгеден 439,90 теңгеге дейін төмендеді. Бес сауда күнінің ішінде АҚШ валютасы 8 теңгеге немесе 1,79%-ға арзандады, деп хабарлайды Kursiv Media.
Апта дүйсенбіде доллардың аздап қымбаттауынан басталды. 21 қыркүйекте KASE-дегі сағат 15:30-дағы орташа сараланған бағам 447,90 теңге болды. Бұл алдыңғы сауда күнінен 78 тиын жоғары еді.
Алайда содан кейін бағыт өзгерді. Сейсенбіде доллар 446,90 теңгеге, сәрсенбіде 444,50 теңгеге, ал бейсенбіде бірден 441,21 теңгеге дейін түсті. Аптадағы ең үлкен бір күндік төмендеу дәл бейсенбіде тіркелді – доллар 3,29 теңгеге арзандады.
Жұма, 25 қыркүйекте сағат 15:30-дағы сауда қорытындысы бойынша USDKZT_TOD орташа сараланған бағамы тағы 1,31 теңгеге төмендеп, 439,90 теңге болды. Осылайша доллар сейсенбіден жұмаға дейін төрт сауда күні қатарынан арзандады.
Теңге қанша нығайды?
Егер аптаның алғашқы және соңғы сауда күндерін салыстырсақ, доллар 447,90 теңгеден 439,90 теңгеге, яғни тура 8 теңгеге төмендеді. Пайызбен есептегенде АҚШ валютасының бағамы 1,79%-ға түсті.
Бұл ретте теңгенің қозғалысын бір ғана фактормен түсіндіру қиын. Ұлттық банк қыркүйекте Ұлттық қордан ішкі нарыққа 200–300 млн доллар сатуды жоспарлаған. Реттеуші қысқа мерзімде теңге бағамына нарық қатысушыларының күтулері, тоқсандық салық төлемдері, әлемдік нарықтағы жағдай және геосаяси факторлар әсер ететінін атап өткен.
