Тимур Турлов FIDE президенті болып сайланғаннан кейін қазақстандықтарға алғыс айтты
Халықаралық шахмат федерациясының (FIDE) президенті болып сайланған Тимур Турлов қазақстандықтарға алғыс айтты, деп хабарлайды Кursiv.Media.
Тимур Турлов сайлауды Қазақстан үшін үлкен жеңіс деп бағалады. Оның айтуынша, нәтижеге елде соңғы жылдары шахматты дамыту бағытында атқарылған жұмыстар ықпал еткен. Ол президент Қасым-Жомарт Тоқаевтың қолдауын да атап өтті.
Турловтың сөзінше, сайлау науқаны кезінде оның командасы Қазақстандағы шахмат жүйесінің дамуы мен спорттың танымалдығын арттыру тәжірибесін басқа ұлттық федерацияларға таныстырған.
«Бірнеше жыл бұрын бүгін шахмат өміріміздің қалыпты бөлігіне айналған дүниелердің көбі енді ғана басталып жатқан еді. Қазір ауқымы мүлде басқа», – деп жазды ол.
FIDE құрамында 200-ден астам ұлттық федерация бар. Турлов олардың мүдделері мен ұстанымдары әртүрлі екенін айтып, ұйым ішінде диалог құрып, ортақ шешімге келе білудің маңызды екенін атап өтті.
Тимур Турлов сайлау науқаны кезінде ұлттық федерацияларға берген нақты уәделерін енді орындау керегін айтты.
«Жұмыс алда өте көп. Өзіме алған жауапкершілікті түсінемін және Қазақстан осы нәтижемен мақтана алатындай болуын қалаймын», – деді ол.
Ол барлық қазақстандыққа қолдауы үшін, сондай-ақ командасы мен президентке алғысын білдірді.
«Бұл – баршамыздың ортақ жеңісіміз», – деп жазды FIDE президенті.
Тимур Турлов 26 қыркүйекте Самарқандта ұйымның Бас ассамблеясы аясында өткен сайлауда жеңіске жеткен еді.
