Жетісуда Қызыл кітапқа енген балықты тасымалдағандар ұсталды

Жетісуда заңсыз ауланған 127 келі балықтың арасынан Қызыл кітапта енген бекіре табылды, деп хабарлайды Kursiv.Media.      

Полиция ақпаратына қарағанда, Үштөбе – Көпбірлік автожолында бірлескен рейдтік іс-шара барысында тіркемесі бар Audi-100 автокөлігінің жүргізушісі тоқтатылған.

«Көлікте Үштөбе қаласының 24, 25 және 41 жастағы үш тұрғыны болған. Тексеру кезінде автокөлік пен тіркемеден жалпы салмағы 127,1 келі балық табылып, тәркіленді», – делінген ақпаратта.

Олардың арасында сазан, жайын, ақмарқа, мөңке және мемлекет ерекше қорғауға алған бекіре тұқымдас балық та бар.

Мұның алдында Ақтауда 200 келіден астам бекіре балығын заңсыз тасымалдағандар ұсталған болатын.