Алматы тауларында жоғалған шетелдікті іздеу жұмыстары әлі жалғасуда

Алматы тауларында 1953 жылы туған шетел азаматын іздеу жалғасып жатыр. Құтқару операциясына қатысушылар саны 50-ден 130 адамға дейін, ал дрондар саны жетіден 11-ге дейін артты, деп хабарлайды Kursiv.Media.

Төтенше жағдайлар министрлігі ақпаратына сүйенсек, іздеу жұмыстары тәулік бойы жүргізілуде.

Іздеу жұмыстары Медеу ауданындағы Талғар асуы маңында, шамамен 3200 метр биіктікте жүргізіліп жатыр. Құтқарушылар қиын учаскелерді, шатқалдар мен беткейлерді, асулар мен шыңдарға апаратын бағыттарды тексеруде.

Операцияға ТЖМ қызметкерлері, полиция, «Барыс» республикалық құтқару қызметі, қалалық мониторинг орталығы және еріктілер тартылған. Сонымен қатар, сегіз техника, үш кинологиялық есеп және ТЖМ авиациясы жұмылдырылды.

Іздеу жұмыстарына таулы жер бедері, биіктік және жетуі қиын учаскелер кедергі келтіріп отыр. Құтқарушылар аумақты ауа райы жағдайын ескере отырып, үздіксіз тексеріп жатыр.

Айта кетейік, 28 қыркүйекте шетел азаматы «Шымбұлақ» аспалы жолымен тауға көтеріліп, кейін қалаға өздігінен түсіп кетпек болған. Алайда ол қонақүйге оралмаған. Оның жоғалғаны туралы ақпарат 29 қыркүйекте «112» қызметіне түскен. Сол күні іздеу жұмыстары басталған.