Ақтөбе облысында тәрбиеші ұйықтап жатқан баланы тырнап кеткен

Ақтөбе облысында тәрбиешінің көмекшісі ұйықтап жатқан балаға жарақат салды деген күдікке ілінді, деп хабарлайды Kursiv.Media.

Halyqstan ақпаратына қарағанда, оқиға туралы зардап шеккен баланың анасы, Шалқар ауданының Айшуақ ауылының тұрғыны Әлинұр Шонанова айтып берген.

Бейнежазбаға түсіп қалған

Оның айтуынша, «Айгөлек» балабақшасында екі жасқа да толмаған ұлының бетінде тырнақ іздері пайда болған.

Жұмыстан оралған әйел бірден мектепке дейінгі білім беру мекемесіне барып, бейнебақылау камераларындағы жазбаларды көрсетуді талап еткен.

Шонанованың айтуынша, бейнежазбада тәрбиешінің көмекшісі ұйықтап жатқан балалардың біріне еңкейіп, оның бетіне қол тигізгені, сосын дереу қаша жөнелгені көрінеді.

«Оқиғадан бір күн бұрын Айшуақ ауылында электр жарығы өшетіні туралы хабарланған болатын. Тәрбиешінің көмекшісі тәрбиешінің жоқтығын пайдаланып, жарықтың өшетінін біле тұра, ұйықтап жатқан баламның бетін әдейі тырнағаны анықталды. Бақытымызға орай, электр жарығы қосылып, бұл сәт камераға түсіп қалған. Әйтпесе, кінәсіз адамдар зардап шегуі мүмкін еді», – деді Шонанова.

Полиция мән-жайды анықтап жатыр

Әйелдің сөзінше, қазір «Айгөлек» балабақшасының бұрынғы меңгерушісі мен мекеме қызметкерлері арасында сот процесі жүріп жатыр.

 «Баламның бетінде тырнақ іздері қалды. Бұл тыртықтар өмір бойы қалып қоя ма деп қорқамын», — дейді баланың анасы.

Полиция оқиғаның мән-жайы анықталып жатқанын хабарлады.

Айта кететін жайт, Тараздағы балабақшада аутизмі бар баланы тынығу кезінде байлап қойғаны анықталды.