Теңгенің тоғыз айдағы серпіні: негізгі валюталар түгел арзандады
2026 жылдың алғашқы тоғыз айында теңге негізгі валюталардың бәріне қатысты айтарлықтай нығайған, деп хабарлайды Kursiv.Media. Графиктегі 1 қаңтармен салыстырғандағы өзгеріске қарасақ, ең көп арзандаған валюта – рубль.
Яғни тоғыз айда теңгемен есептегенде рубль шамамен 16,40%, еуро 16%, доллар 12,6%, юань 8,9%-ға арзандаған.
Доллар біртіндеп төмендеді
Доллар жыл басында аздап қымбаттағанымен, наурыздан бастап негізінен төмендеді. Көктемнің ортасында қысқа мерзімге қалпына келіп, жаздан кейін қайта нығая бастады. Осының нәтижесінде қазанның басында доллардың теңгеге шаққандағы бағамы жыл басындағы деңгейден 12,58% төмен тұр.
Еуро да 16%-ға арзандады
Еуро динамикасы доллармен ұқсас, бірақ төмендеуі тереңірек. Наурыздағы әлсіреуден кейін мамыр-маусымда аздап қалпына келгенімен, жаздың екінші жартысында қайта төмендеді. Тоғыз ай қорытындысында еуро 15,91% арзандады.
Рубль – ең құбылмалы валюта
Графиктегі ең үлкен ауытқу рубльде байқалады. Мамыр-маусым айларында рубль жыл басындағы деңгейден бірнеше пайыз жоғары көтерілген, кейін бағыты күрт өзгерді. Шілдеден бері арзандау жылдамдап, қазан айының басында рубль жыл басындағы көрсеткіштен 16,40% төмендеді. Бұл – төрт валютаның ішіндегі ең үлкен құлдырау.
Юань салыстырмалы түрде тұрақты
Юань да теңгеге қатысты арзандады, бірақ басқа валюталарға қарағанда төмендеу әлдеқайда баяу болды. Қазан басындағы көрсеткіш жыл басынан 8,88% төмен. Сондықтан тоғыз айда теңгеге қарсы ең жақсы сақталған валюта юань.
Жалпы алғанда, 2026 жылдың тоғыз айындағы негізгі тренд – теңгенің күшеюі. Төрт валютаның бәрі жыл басындағы деңгейінен төмен түсіп отыр. Әсіресе жаздың екінші жартысынан бастап рубль, еуро және доллардың теңгеге шаққандағы бағамы айтарлықтай төмендеген.
