Талдықорғанда әйелін тапаншамен қуып жүрген ер адам ұсталды

Талдықорғанда әйелін ұрып-соғып, тапаншамен қуып жүрген ер адам ұсталды, деп хабарлайды Kursiv.media.   

Halyqstan ақпаратына қарағанда, әлеуметтік желілерде жеке үйдің ауласында тек іш киіммен жүрген, қолында тапаншаға ұқсас зат ұстаған ер адам әйелді қуып жүрген видео тараған.

Кейбір мәліметтерге қарағанда, ер адам бір жасар баласы ұйықтатпай қойғанына ашуланып, жанжал шығарып, әйелін ұрып-соққан.

Жетісу облысының полиция департаменті 2 қазанда әйел күйеуі дене жарақатын салғанына шағымданып, өзіне қауіп төндіргені туралы арызбен жүгінгенін хабарлады.

Ер адам ұсталды. Оның жанынан пневматикалық қару табылып, тәркіленген.

Дене жарақатын салу және қорқыту фактілері бойынша қылмыстық істер қозғалды. Күдікті уақытша ұстау изоляторына қамалды.

Дәрігерлердің тексеруінен кейін әйел баласымен бірге дағдарыс орталығына орналастырылды.

Айта кететін жайт, Алматы облысының Қарасай ауданында да осыған ұқсас оқиға болды. Полиция қызметкерлері әйеліне қол жұмсаған 31 жастағы жергілікті тұрғынды ұстап, уақытша ұстау изоляторына қамады.