Қазақстан 602 млн долларға күнбағыс майын экспорттады: негізгі сатып алушылар кім
2026 жылдың қаңтар–шілде айларында Қазақстан $601,8 млн-ға күнбағыс майын экспорттаған. Экспорттың басым бөлігі Өзбекстан мен Қытай нарығына тиесілі. Kursiv Media Ұлттық статистика бюросының деректерін саралады.
Қазақстандық күнбағыс майының ең ірі сатып алушысы – Өзбекстан. Жеті айда көрші елге $249 млн өнім жөнелтілген. Бұл күнбағыс майы экспортының 41,4%-ына тең.
Екінші орында Қытай тұр. Бұл елге жеткізілген өнім құны $205,8 млн, ал жалпы экспорттағы үлесі 34,2% болған. Осылайша, Өзбекстан мен Қытайдың жиынтық үлесі 75,6%-ға жетеді. Яғни Қазақстан экспорттаған күнбағыс майының шамамен төрттен үш бөлігі осы екі нарыққа кеткен.
КҮНБАҒЫС МАЙЫ
Өзбекстан
Қытай
Ауғанстан
Тәжікстан
Иран
Қырғызстан
Түрікменстан
Ресей
Түркия
Моңғолия
Үшінші орында Ауғанстан – $51,1 млн немесе 8,5%. Одан кейін Тәжікстанға $49,4 млн, Иранға $38,2 млн күнбағыс майы экспортталған. Бұл елдердің үлесі тиісінше 8,2% және 6,3%.
Қырғызстан мен Түрікменстанға жеткізілім көлемі айтарлықтай төмен. Қырғызстанға – $4,9 млн, Түрікменстанға – $3,3 млн өнім сатылған.
Ресей, Түркия және Моңғолия бағытындағы экспорт әзірге өте аз. Ресейге $77 мың, Түркияға $57 мың, ал Моңғолияға небәрі $1 мың көлемінде күнбағыс майы жөнелтілген.
КҮНБАҒЫС МАЙЫ
Экспорттың жартысынан астамы екі өңірге тиесілі
Өңірлер арасында күнбағыс майын экспорттаудан Шығыс Қазақстан облысы көш бастап тұр. Қаңтар–шілдеде облыстан шетелге $169,3 млн өнім шығарылған. Оның жалпы экспорттағы үлесі – 28,1%.
Екінші орында Абай облысы. Өңірдің экспорты $149,8 млн-ға жетіп, жалпы көлемнің 24,9%-ын құрады.
Тек осы екі облыстың өзіне Қазақстанның күнбағыс майы экспортының 53%-ы, яғни шамамен $319,1 млн тиесілі.
Үшінші орында Астана қаласы – $97,8 млн немесе 16,3%. Одан кейін Түркістан облысы – $45,4 млн, Ақтөбе облысы – $25,6 млн және Шымкент қаласы – $22,4 млн.
Алматы облысының үлесі 3,2%, Алматы қаласының үлесі 2,3% болды. Солтүстік Қазақстан облысы $11,5 млн, Ақмола облысы $9,2 млн күнбағыс майын экспорттаған.
Павлодар мен Қостанай облыстарында көрсеткіш бірдей – $8,5 млн. Атырау облысының экспорты $8,3 млн, Батыс Қазақстан облысында $7,1 млн болды.
Ең төмен көрсеткіштердің бірі Қызылорда облысында тіркелген – небәрі $66 мың. Қарағанды, Маңғыстау және Ұлытау облыстарында осы кезеңдегі экспорт статистикасында іс жүзінде нөлдік көрсеткіш көрсетілген.
Жалпы дерек Қазақстанның күнбағыс майы экспорты әрі нарықтар, әрі өңірлер бойынша жоғары деңгейде шоғырланғанын көрсетеді: экспорт түсімінің үштен төртінен астамын екі мемлекет қамтамасыз етсе, ішкі экспорттың жартысынан көбі Шығыс Қазақстан мен Абай облыстарына тиесілі.
