Шымкентте су құбырын ауыстыру кезінде екі жұмысшы қаза тапты

Шымкентте құдық ішіндегі су құбырын ауыстыру кезінде екі жұмысшы қаза тапты, деп хабарлайды Kursiv.Media.

31 арнаның хабарлауынша, оқиға қала орталығында болған. Куәгерлердің айтуынша, жеке компанияның 20-22 жастағы жастағы үш қызметкері құдыққа түсіп, ұзақ уақыт бойы шықпай қойған. Күдіктенген әріптестері оларды сыртқа алып шыққан. Жұмысшылардың екеуі оқиға орнында көз жұмды, ал аман қалған үшіншісіне медициналық көмек көрсетіліп, үйіне жіберілді.

Полиция қылмыстық іс қозғады.

«Құбыр жүргізу кезінде жұмысшылардың қаза табуына байланысты сотқа дейінгі тергеу жүріп жатыр. Алдын ала мәлімет бойынша, олар құдық ішінде жиналып қалған газға уланған», – делінген хабарламада.

Құқық қорғау органдары оқиғаның мән-жайын және қауіпсіздік талаптарының сақталуына жауапты тұлғаларды анықтап жатыр.

Бұған дейін, Шығыс Қазақстан облысының Глубокое ауданында жүк тиегіш 56 жастағы жұмысшыны басып кетті. Ер адам оқиға орнында көз жұмды.