Қайрат Нұртастың концертін ұйымдастырушылардың бірі қамауға алынды

Шымкентте Қайрат Нұртастың концерті кезінде 18 жастағы қыздың жарақат алуына байланысты қылмыстық іс қозғалды. Полиция концертті ұйымдастырушылардың бірі ұсталып, уақытша ұстау изоляторына қамалғанын хабарлады.

Шымкент қалалық полиция департаментінің мәліметінше, ұсталған азамат 1984 жылы туған. Ведомство оның аты-жөнін жариялаған жоқ.

Алдын ала мәлімет бойынша, концертке сатылған билеттер саны іс-шара өтетін орынның рұқсат етілген сыйымдылығынан бірнеше есе асып кеткен.

Соның салдарынан концерт алаңында адам шамадан тыс жиналып, көрермендердің қауіпсіздігіне қатер төнген.

«Адамдардың қысылып қалуы салдарынан 18 жастағы қыз жарақат алып, ауруханаға жеткізілді», – деп хабарлады полиция.

Полиция әлеуметтік желіде концерт кезінде адамдар қаза тапқаны туралы тараған ақпаратты да жоққа шығарды.

«Қаза болғандар жоқ», – деп мәлімдеді ведомство.

Еске салайық, 10 қазанда Қажымұқан Мұңайтпасов атындағы стадионда өткен Қайрат Нұртастың концерті кезінде сегіз адам медициналық көмекке жүгінген. Олардың жетеуі тексеруден кейін үйлеріне жіберілді. Ал 18 жастағы қыз ауруханаға жатқызылды.

11 қазан күні таңертең дәрігерлер қыздың жағдайын тұрақты ауыр деп бағалаған. Денсаулығында аздаған жақсару байқалған.

Қылмыстық іс бойынша тергеу жалғасып жатыр.