Алматыда Төле би мен Пушкин көшелерінің бір бөлігі жабылады

Алматыда жол жөндеу жұмыстарына байланысты Төле би және Пушкин көшелерінің кейбір учаскелерінде көлік қозғалысы уақытша шектеледі, деп хабарлайды Кursiv.Media.

Қалалық әкімдік хабарлауынша, Төле би көшесінде 16 қазанға дейін Әшімов көшесінен Нұрпейісов көшесіне дейінгі аралықта екі бағыттағы қозғалыс шектеледі. Бұл учаскеде апаттық-қалпына келтіру жұмыстары жүргізіліп жатыр.

Пушкин көшесінде 12–18 қазан аралығында Мақатаев көшесінен Райымбек даңғылына дейінгі учаске күн сайын сағат 21:00-ден таңғы 06:00-ге дейін жабылады. Күндіз көлік қозғалысы ашық болады.

Айта кетейік, Алматыда LRT-ның бірінші кезеңі 2027 жылдың желтоқсанында аяқталады. Ол Алатау ауданындағы Индустриялық аймақтан Момышұлы көшесі арқылы Төле би көшесіне дейін, одан Төле би бойымен Абылай хан даңғылы арқылы Алматы-2 вокзалына дейін барады. 

Екінші кезеңінде қоғамдық көлікті Төле би көшесі арқылы «Барлық» базарына дейін ұзарту жоспарланған.