Алматыда тұмауға қарсы екпе салу басталды: кімдер тегін алады

Алматыда тұмауға қарсы маусымдық екпе салу басталды. Қала тұрғындарының кейбір санаттары екпені тегін ала алады, деп хабарлайды Kursiv.Media.

Алматыдағы №36 қалалық емхананың педиатрия бөлімінің меңгерушісі Дильдора Кенжаева тұмауға қарсы екпенің кімдерге тегін салынатынын түсіндірді.

Дәрігердің айтуынша, вакцина бірінші кезекте ауру жұқтыру және оның асқыну қаупі жоғары азаматтарға салынады.

«Бірінші кезекте бұл балалар, жүкті әйелдер, 65 жастан асқан адамдар, созылмалы аурулары бар пациенттер және медициналық көрсетілімдерге сәйкес азаматтардың басқа да санаттары», – деді Дильдора Кенжаева.

Тегін екпе алуға құқығы бар-жоғын білу үшін тұрғындар өздері тіркелген емханаға хабарласуы керек. Сол жерден вакцина салу жүргізілетін орын мен тәртібі туралы ақпарат алуға болады.

Мамандардың айтуынша, тұмауға қарсы екпе салу аурудың алдын алудың тиімді тәсілдерінің бірі саналады. Екпе тұмау жұқтыру ықтималдығын төмендетіп, ауру асқынуының алдын алуға көмектеседі.

Елде маусымдық тұмауға қарсы тегін вакцина алу науқаны қазан айының алғашқы күндері басталды. Биыл Ресейде өндірілген «Гриппол» вакцинасының 2,1 млн дозасы сатып алынды, оның алғашқы 564 мыңы елге жеткізілді. Вакцина өңірлерге кезең-кезеңімен таратылып, екпе жұмыстары ДДҰ ұсынымдарына сәйкес жүргізіліп жатыр.