Астанада ипотеканың бастапқы жарнасына 1,5 млн теңге беріледі: кімдер ала алады
Астанада тұрғын үй алуды жоспарлап жүрген азаматтар ипотеканың бастапқы жарнасына мемлекеттен 1,5 млн теңгеге дейін тұрғын үй сертификатын ала алады, деп хабарлайды Kursiv.media.
Бұл қолдау пәтер сатып алу кезінде төленетін бастапқы жарнаның бір бөлігін жабуға мүмкіндік береді. Алайда сертификат алу үшін белгілі бір талаптарға сай болу қажет. Соның бірі – отбасының табысына қойылатын шектеу.
Кімдер тұрғын үй сертификатын ала алады?
Бағдарлама аясында мына санаттағы азаматтар мемлекеттік қолдауға үміткер бола алады:
- педагогтер;
- медицина қызметкерлері;
- полиция қызметкерлері;
- құтқарушылар;
- мәдениет және спорт саласының қызметкерлері;
- тұрғын үй кезегінде тұрған әлеуметтік осал топтағы азаматтар.
Тұрғын үй сертификаты ипотекалық қарыз бойынша бастапқы жарнаның бір бөлігін төлеуге арналған. Оның ең жоғары мөлшері – 1,5 млн теңге.
Сертификат алу үшін табыс қанша болуы керек
Бағдарламаға қатысу үшін отбасының соңғы алты айдағы орташа айлық табысы белгіленген шектен аспауы тиіс.
Негізгі талап – отбасының әр мүшесіне шаққандағы орташа айлық табыс күнкөріс минимумының 3,1 еселенген мөлшерінен аспауы керек.
Бұл талап өтініш берушінің мемлекеттік қолдау алуға құқығын анықтау кезінде ескеріледі.
Қалай өтініш беруге болады
Тұрғын үй сертификатын алу үшін өтінішті екі жолмен беруге болады:
- Онлайн: hc.kezekte.kz сайты арқылы;
- Жеке барып: Астананың тұрғын үй қорына жауапты ұйымына өтініш беру арқылы.
Өтініш бермес бұрын бағдарлама талаптарымен танысып, қажетті құжаттарды нақтылап алған жөн.
Тұрғын үй сертификаты бастапқы жарнаның бір бөлігін жабуға көмектескенімен, ипотеканы мақұлдау және қалған соманы төлеу мәселесі банк талаптарына да байланысты.
Еске салайық, Отбасы банк ипотеканы қайта қаржыландыруды 23 қазанға дейін тоқтатты.
