Өзбекстанда балаларға жыныстық зорлық көрсеткендерге жаза күшейтілді

Өзбекстан президенті Шавкат Мирзиёев кәмелетке толмағандардың жыныстық қолсұғылмаушылығына қарсы қылмыстар үшін жазаны қатаңдатуды көздейтін заңға қол қойды, деп хабарлайды Kursiv.Media.

«Балаға қатысты зорлық-зомбылыққа жол берілмейді, ал жаза қатаң болуы керек. Балаға зиян келтіріп, оның жанын жаралаған әрбір адам жауапқа тартылады. Бұл білім беру мекемелерінің қызметкерлеріне де, зорлық жасаған туыстарына да қатысты. Баланың өліміне әкеп соққан кез келген қылмыс үшін жазаны жеңілдетуге жол берілмейді», – деп жазды президент әкімшілігінің басшысы Саида Мирзиёева.

Жаңа заңға сәйкес, 14 жасқа толмаған балаға жыныстық зорлық-зомбылық жасағандарға 25 жылға дейін немесе өмір бойына бас бостандығынан айыру жазасы тағайындалуы мүмкін. Мұндай қылмыстарға ескіру мерзімі қолданылмайды.

«Балалардың өміріне, денсаулығы мен қадір-қасиетіне қол сұғатын әрбір адам қатаң жазадан құтылмайтынын білуі керек», – деді Мирзиёева.

Жаңа заң бес кодекс пен алты заңға өзгерістер енгізуді көздейді.

Бұған дейін Өзбекстанда 14 жасқа толмаған баланы зорлағаны үшін 15 жылдан 20 жылға дейін бас бостандығынан айыру жазасы қарастырылған болатын.