Түркия футболдан «Түркі кубогын» өткізуді ұсынды

Түркия түркі мемлекеттерінің қатысуымен жаңа халықаралық футбол турнирін ұйымдастыруды ұсынып отыр. «Түркі кубогы» деп аталатын жарысты екі жылда бір рет өткізу жоспарланған. Оған Қазақстан, Әзербайжан, Қырғызстан, Өзбекстан және басқа да түркі елдерінің құрамалары қатысуы мүмкін, деп хабарлайды Kursiv.Media Cronos.Asia басылымына сілтеме жасап.

Бұл бастаманы Түркияның Әділет және даму партиясы (AK Parti) төрағасының орынбасары, түркі мемлекеттерімен байланыс бағытына жетекшілік ететін Күршад Зорлу көтерді.

Ол жаңа турнир ұйымдастыру туралы ұсынысты Түркияның Коджаэли қаласында өткен түркі әлемі жастарының кездесуінде жариялады. Зорлудың айтуынша, «Түркі кубогын» өткізу мәселесін Түркия футбол федерациясы мен елдің Жастар және спорт министрлігі бірлесіп пысықтауға тиіс.

Жобаның басты мақсаты – түркі мемлекеттері арасындағы спорттық байланысты нығайту, жас таланттарды анықтау және футболшылардың кәсіби дамуына мүмкіндік жасау. Әзірге турнирдің нақты қашан басталатыны, қандай форматта өтетіні және оған қай елдердің қатысатыны белгісіз.

Қазақстандық футболшылар Түркияда легионер саналмауы мүмкін

Күршад Зорлу түркі мемлекеттерінен келген футболшыларға қатысты ережені өзгерту бастамасын да көтерді.

Оның айтуынша, бұл мәселе Түркия футбол федерациясының басшылығымен талқыланған. Ұсыныс бойынша Қазақстан, Әзербайжан, Қырғызстан, Өзбекстан және басқа да түркі елдерінің ойыншылары шетелдік футболшылар санатынан шығарылып, арнайы мәртебеге ие болуы мүмкін.

Қазіргі уақытта қазақстандық футболшылар Түркия клубтарына ауысқан жағдайда легионер болып есептеледі және шетелдік ойыншыларға арналған орындардың бірін алады.

Егер жаңа ереже қабылданса, Қазақстан футболшылары Түркия чемпионатында легионерлерге қойылатын шектеусіз немесе жеңілдетілген талаптармен өнер көрсетуі ықтимал. Бұл түрік клубтарының қазақстандық ойыншыларға қызығушылығын арттыруы мүмкін.

Дегенмен Түркия футбол федерациясы әзірге ресми шешім қабылдаған жоқ. Жаңа мәртебенің нақты қай мемлекеттердің азаматтарына берілетіні және қандай дивизиондарда қолданылатыны белгісіз.

Еске сала кетейік, бұған дейін Түркі мемлекеттері ұйымы аясында азаматтардың өзара сапарын жеңілдетуге бағытталған тағы бір бастама талқыланған еді. Қазақстан азаматтары болашақта Түркия, Әзербайжан, Қырғызстан және Өзбекстанға шетелдік паспортсыз, тек жеке куәлікпен бара алуы мүмкін.