Қазақстан мұнайын Баку – Тбилиси – Жейхан құбыры арқылы тасымалдауды арттырмақ
Қазақстан президенті Қасым-Жомарт Тоқаев АӨСШК VII саммитінде көлік дәліздерін дамыту, энергетикалық қауіпсіздікті нығайту және су ресурстарын тиімді пайдалану жөнінде бірқатар бастама көтерді.
Мемлекет басшысы Әзербайжан мен Армения арасындағы бітім процесін қолдап, Оңтүстік Кавказдағы келіссөздер тәжірибесі көреген көшбасшылықтың маңызын көрсеткенін атап өтті. Сондай-ақ АӨСШК аясында «Бір белдеу, бір жол», Орта дәліз және Солтүстік – Оңтүстік халықаралық көлік дәлізі сияқты бағыттардың әлеуетін зерделеуге мүмкіндік беретін көлік байланысы стратегиясын әзірлеуді ұсынды.
Тоқаев энергетикалық қауіпсіздікке төнген қатерлерге тоқталып, Қазақстан, Әзербайжан және Өзбекстанның жасыл энергия жеткізу жөніндегі стратегиялық серіктестігін атап өтті. Бұл келісім Каспий жасыл энергетикалық дәлізін дамытуға және электр энергиясын Қара теңіз арқылы Еуропа нарығына жеткізуге жол ашуы мүмкін.
«Қазақстан, Әзербайжан және Өзбекстан жасыл энергия жеткізу жөніндегі стратегиялық серіктестік туралы келісімге қол қойды. Осылайша, Каспий жасыл энергетикалық дәлізінің негізі қаланды», – деді президент
Мемлекет басшысы Қазақстан мұнайын Баку – Тбилиси – Жейхан құбыры арқылы тасымалдау көлемін арттыру жоспары бар екенін де айтты. Оның пікірінше, Каспий теңізін сақтау үшін өңір елдері су ресурстары мен экология мәселелерінде бірлесіп әрекет етуі қажет.
Сонымен қатар Тоқаев АӨСШК аясында су ресурстары жөніндегі серіктестік құруды ұсынып, технология алмасу мен су үнемдеу шешімдерін дамытуға шақырды. Ол БҰҰ жүйесінде су мәселелері бойынша жаһандық күн тәртібін үйлестіретін Халықаралық су ұйымын құру бастамасын да еске салды.
Президент адам капиталын дамытуға да ерекше мән берді. Қазақстан АӨСШК-ге мүше 28 мемлекеттің студенттеріне шәкіртақы тағайындауға және ғалымдарға зерттеу гранттарын беруге дайын екенін мәлімдеді. Бұл бастамалар жастардың білімін жетілдіріп, ғылыми ынтымақтастықты нығайтуға бағытталған.
