Армения Әзербайжаннан электр энергиясын сатып ала бастауы мүмкін

Армения Әзербайжанмен өзара электр энергиясын жеткізу мүмкіндігін, оның ішінде қажет болған жағдайда көрші елден электр энергиясын сатып алуды қарастырып жатырі, деп хабарлайды Kursiv.Media.

Арменияның аумақтық басқару және инфрақұрылым министрі Давид Худатянның айтуынша, қолда бар инфрақұрылымды зерделеу оны салыстырмалы түрде аз инвестициямен пайдалануға болатынын көрсеткен. Осындай тәсіл Арменияға артық электр энергиясын Түркияға сатуға немесе қажет болған жағдайда сатып алуға мүмкіндік беретін Карс – Гюмри электр желісіне қатысты да қарастырылуда.

Худатян бұған дейін Арменияда электр энергиясы артығымен болғанын, алайда тұтынудың өсуі, оның ішінде кәсіпорындардың және жасанды интеллектпен байланысты деректерді өңдеу орталықтарының дамуына байланысты көрші елдерден қосымша жеткізілімдер қажет болуы мүмкін екенін атап өтті.

Қазіргі уақытта Армения Иранға табиғи газға айырбас ретінде бартерлік сызба аясында электр энергиясын жеткізеді, сондай-ақ Грузияға электр энергиясын экспорттайды.

Болашақта Ереван Әзербайжанды қоса алғанда, көрші мемлекеттермен энергетикалық ынтымақтастықты кеңейтуді қарастырып отыр.

Айта кетейік, осыған дейін Армения премьер-министрі Никол Пашинян Ереван мен Баку арасында аумақ алмасу бастамасын көтерген еді.